យើងចូលចិត្តនិយាយថានារីដែលរកបានបុរសសង្ហា មានទ្រព្យ ឬ មានចំណេះជាគូគាប់ ច្រើនតែជានារីមានសំណាង។ សំណាង ឬមិនសំណាងមិនមែនសំដៅលើរូបរាងខាងក្រៅ ទឹកលុយក្នុងធនាគារ ឬសូម្បី តែចំណេះ ដែលមាននៅក្នុងខ្លួន បុរសនោះឡើយ។ ពោលគឺសំដៅទៅលើទឹកចិត្ត ក្តីស្រឡាញ់ និងការប្រព្រឹត្តរបស់បុរសនោះ ចំពោះនារីដែលខ្លួនស្រឡាញ់។ ថ្ងៃនេះខ្ញុំសូមលើកយកវិធីងាយៗ ដែលទំនងជាអាចឱ្យនារីៗ សម្គាល់បានខ្លះ ថាតើយើងធ្វើដូចម្តេច ទើបអាចដឹងថាបុរសដែល យើងកំពុងសេពគប់ជាមួយ ជាមនុស្សដែលឱ្យតម្លៃយើង ឬក៏អត់។
១. មិនបំបាក់មុខយើង ទោះនៅតែពីរនាក់ នៅទីសាធារណៈ ឬ កណ្តាលចំណោម
គេចូលចិត្តនិយាយថាបុរសត្រូវការកិត្តិយសណាស់។ ពាក្យនេះមិនខុសទេ។ តែសូមកុំភ្លេចថានារីក៏ស្រឡាញ់កិត្តិយសរបស់ ខ្លួន។ បុរសដែលស្រឡាញ់កិត្តិយស សូមឱ្យវាជាកិត្តិយសដ៏ថ្លៃថ្នូរ ដែលមិនមែន បានមកពីការជិះជាន់លើស្ត្រី ការគ្រប់ គ្រងលើស្ត្រី ឬការស្តីបន្ទោសឱ្យស្ត្រី ទោះយើងនៅតែពីរនាក់ ឬក៏ទីសារធារណៈក៏ដោយនោះទេ។ បើសិនជាអ្នកជាស្វាមី ហើយហៅមិត្តភក្តិមកហូបចុកនៅផ្ទះ ហើយបញ្ជាឱ្យប្រពន្ធធ្វើម្ហូបនេះ ឬម្ហូបនោះ ដើម្បីទទួលមិត្តរបស់អ្នក។ លុះប្រពន្ធ លើកមកយឺត ឬធ្វើមិន ទាន់ចិត្ត ឬមិនឆ្ងាញ់ អ្នកក៏តាំងស្តីឱ្យនាងភ្លាមៗ ដោយមិនទុកមុខឱ្យ មិនយល់ពីការលំបាក របស់នាង ដែល មើលកូនផង ហើយធ្វើម្ហូបជាច្រើនមុខ ក្នុងពេលតែមួយ ដោយគ្មានអ្នកជួយ។ ការណ៍ដែលអ្នកអាច ស្តីឱ្យនាងបាន មិនមែនហៅថាអ្នកជាប្រុសខ្លាំង ឬយកជ័យជំនះកាន់ពានកិត្តិយសក្នុងវង់ផឹកស៊ីរបស់អ្នកបាននោះទេ។ តែនេះហៅ ថាប្តីមិនឱ្យតម្លៃភរិយា។
២. គ្មានទឹកចិត្ត
មិនប្រាកដថាគ្រប់បុរសដែលស្រឡាញ់នារី សុទ្ធតែមានទឹកចិត្តចំពោះនាងនោះទេ។ អ្នកខ្លះបានតែ ស្រឡាញ់ រកស្រួល រកល្អឱ្យតែខ្លួនឯងប៉ុណ្ណោះ។ ពេលនាងមានបញ្ហាតិចតួច ក៏ធ្វើជាមិនរវល់ ដោយយក លេសថាខ្លួនរវល់ពេក ទើបមិនដឹង។ គេថាមនុស្សស្តីចូលចិត្តពិបាកចិត្ត ទោះបីជារឿងតូចតាច ដូច្នេះហើយ ទើបបុរសមិនសូវចាប់អារម្មណ៍។ រឿងតូចតាចក៏ដោយ ធំក៏ដោយ បើបុរសនោះ ជាមនុស្សគ្មានទឹកចិត្ត គឹនឹងមិនខ្វល់ដាច់ខាត។ ក្រៅពីនេះ ក៏យើងអាចសម្គាល់បាននៅពេលចេញទៅ ក្រៅជាមួយគ្នាបានដែរ។ ឧទាហរណ៍ថា យើងទិញកាហ្វេពីរកែវ ហើយយើងត្រូវស្ពាយកាតាបផង។ បើយើងដើរម្នាក់ឯង មិនសូវអីទេ។ តែបើដើរជាមួយបុរសដែលស្រឡាញ់យើង ហើយគេដើរទៅដោយ គ្មានចាប់អារម្មណ៍សួរថា គេអាចជួយកាន់កែវកាហ្វេបានឬអត់ នោះក៏អាចបង្ហាញថាគេមិនឱ្យតម្លៃយើងទេ ព្រោះគេជាមនុស្សគ្មានទឹកចិត្ត។ ខ្ញុំដឹងថាបើនិយាយពីសមភាពយេនឌ័រ គឺស្ត្រីអាចកាន់ខ្លួនឯងបាន ដោយមិនចាំបាច់បុរសទេ តែអ្វីដែលខ្ញុំនិយាយនៅ ទីនេះគឺ រឿងរ៉ាវរបស់បុរស និង ស្ត្រី ដែលជា មនុស្សស្រឡាញ់គ្នា។
៣. មិនទុកទូរសព្ទសំខាន់ជាងយើង
បើវត្តមានរបស់យើងសំខាន់សម្រាប់គេ ហើយរូបយើងមានតម្លៃក្នុងដួងចិត្តគេ រាល់ពេលដែលនៅ ក្បែរយើង ឬនៅជាមួយគ្នា គេគួរតែទុកទូរសព្ទនៅម្ខាង លើកលែងតែពេលមានការងារបន្ទាន់ត្រូវដោះ ស្រាយ។ បើសិនជាទៅណាមកណាជាមួយគ្នា គេលេងតែទូរសព្ទ នោះក៏ទំនងជាមានន័យថាតម្លៃរបស់ យើងមិនស្មើនឹងទូរសព្ទដែលនៅក្នុងដៃរបស់គេផង។
៤. មិនណែនាំយើងឱ្យស្គាល់អ្នកណាសោះ
បើទោះជាទំនាក់ទំនងស្នេហាមិនទាន់ឈានដល់ការគិតគូរពីការរៀបការ ហោចណាស់ គេប្រហែលជា ណែនាំយើងឱ្យស្គាល់ មនុស្សណាម្នាក់ដែលជិតស្និទ្ធនឹងគេ។ ស្រឡាញ់គ្នាមិនមែនជារឿងខុសច្បាប់ ដរាបណាយើងមិនទៅលួចស្រឡាញ់ប្តី ឬប្រពន្ធគេ ឬបុគ្គល ដែលមិនត្រូវបានអនុញ្ញាតឱ្យមានស្នេហា ពេលបំពេញតួនាទីរបស់ខ្លួន។
៥. បំបាក់ទឹកចិត្តយើងមិនឱ្យបន្ត ឬដើរទៅក្តីសុបិន
មនុស្សគ្រប់គ្នាសុទ្ធតែលមានក្តីសុបិនថាចង់ក្លាយជាអ្វី ឬចង់ធ្វើអ្វី។ ទោះបីជាការដើរទៅដល់គោលដៅគឺ ជាទំនួលខុស ត្រូវរបស់យើង ប៉ុន្តែបើយើងមានដៃគូ គេក៏គួរតែមានចំណែកក្នុងការជួយជំរុញយើងឱ្យ ដើរដល់ក្តីសុបិន។ មិនមែនមក បង្អាក់យើង ហើយប្រាប់ថាយើងធ្វើមិនកើត រួចគួរមកជួយការងារគេ វិញនោះទេ។ មនុស្សដែលស្រឡាញ់យើង គួរតែជា មនុស្សដែលយល់ពីយើងជាងគេ ជំរុញយើងជាងគេ និងឱ្យតម្លៃក្តីសុបិនរបស់យើងជាងគេ។ តែបើយើងចង់ធ្វើអ្វី ក៏គេហាម ក៏គេបង្អាក់ ហើយយើងក៏ ធ្វើតាមគេ នោះមិនមែនជារឿងដ៏ត្រឹមត្រូវទេ។ ចុះបើបែកគ្នា យើងមិនបាត់បង់ទាំងមនុស្ស និងសុបិន របស់យើងទៅហើយមែនទេ?
៦. សន្យាខ្យល់
ពេលគេលែងចាំគ្រប់រឿងដែលបាននិយាយជាមួយយើង ហើយធ្វើវាជារឿយៗ នោះបានន័យថាតម្លៃ របស់យើងវាមិនខុស ពីខ្យល់ ដែលបក់ប៉ះកាយរបស់គេ រួចហើយក៏ផុតទៅបាត់ ដោយគ្មានបន្សល់ទុកអ្វីទាំងអស់។ បើអ្វីដែលគេសន្យា គេបែរ ជាភ្លេច មិនរវល់ ហើយមិនសូម្បីតែប្រាប់យើងពីហេតុផល នោះប្រហែលជាសញ្ញាមួយនៃការអស់ក្តីស្រឡាញ់ និងលែងឱ្យ តម្លៃយើងផងក៏មិនដឹង។
៧. សម្រេចចិត្តគ្រប់រឿង ដោយមិនចាំបាច់ប្រាប់ ឬពិភាក្សាជាមួយយើង
មនុស្សម្នាក់ៗមានសិទ្ធិសម្រេចនូវរឿងដែលពាក់ព័ន្ធនឹងជីវិតរបស់ខ្លួនឯង។ ប៉ុន្តែការចេះយករឿងរ៉ាវ ណាមួយ ទៅប្រាប់ ឬពិភាក្សាជាមួយមនុស្សដែលយើងស្រឡាញ់គឺបង្ហាញពីការគោរព និងឱ្យតម្លៃរបស់យើងចំពោះ មនុស្សដែលយើង ស្រឡាញ់។ ចំពោះនារីវិញ នាងមិនមែនទៅទាមទារដឹងរឿងរបស់ ដែលស្រឡាញ់នាងគ្រប់រឿងនោះទេ តែពេលដែលបុរស នោះមិនដែលរំលងនាងនូវរាល់ការសម្រេចចិត្តធំៗ នោះនឹងធ្វើឱ្យនាងមានអារម្មណ៍ថានាងត្រូវបានផ្តល់តម្លៃក្នុងនាមជាស្ត្រី ដែលគេស្រឡាញ់។
៨. ដឹងតាមរយៈអារម្មណ៍ខ្លួនឯង
រឿងនេះមិនអាចមានអ្នកណាមកប្រាប់យើងបានទេ។ តែវាជាការដឹងដោយអារម្មណ៍។ មិនមែននៅសុខៗ និងពីមួយថ្ងៃ ទៅមួយថ្ងៃ យើងចេះតែមានអារម្មណ៍ថាយើងគ្មានតម្លៃក្នុងភ្នែកបុរសដែលស្រឡាញ់យើងនោះទេ។ វាអាចមកពីបុរសនោះ បានធ្វើអ្វីមួយឱ្យយើងដក់ជាប់នូវមន្ទិល។ ករណីនេះសូមសាកសួរ ខ្លួនឯងឱ្យច្បាស់ថាយើង កំពុងតែមានអារម្មណ៍គ្មាន តម្លៃសម្រាប់គេ ដោយសារទង្វើរបស់គេមកលើយើង ឬក៏ដោយសារតែយើងកំពុងជួបនូវវិបត្តិណាមួយ (ឧ. អារម្មណ៍ធ្លាក់ទឹកចិត្ត ឬជំងឺធ្លាក់ទឹកចិត្ត ដែលធ្វើឱ្យយើងគិតថាខ្លួនជាមនុស្សគ្មានតម្លៃ)។
៩. មិនប៉ះពាល់ខ្លួនយើងដោយគ្មានការអនុញ្ញាត
ជាមនុស្សស្រឡាញ់គ្នា បើខាងប្រុសឱ្យតម្លៃ ច្បាស់ណាស់គេនឹងសុំអនុញ្ញាតពីយើងជាមុនសិន។ ជាមនុស្សស្រឡាញ់គ្នា មិនមែនមានន័យថាគេចង់ចាប់ដៃ ចង់ថើប យើងពេលណាក៏បាន ទីណាក៏បាននោះទេ។ បើបុរសណានៅតែមានះធ្វើបែបនេះ ដោយយើងមិនយល់ព្រម ហើយយើងមានអារម្មណ៍មិនស្វាគមន៍ ភ័យខ្លាច នោះបានន័យថាគេកំពុងតែបៀតបៀន ផ្លូវភេទលើ យើងហើយ។ សូមអានអត្ថបទ#ការបៀតបៀនផ្លូវភេទនៅកន្លែងធ្វើការ (https://kimdyna19.wordpress.com/2020/06/15/ការបៀតបៀនផ្លូវភេទនៅកន្/) ដើម្បីឈ្វេងយល់បន្ថែម។
អាចនៅមានចំណុចផ្សេងៗ ដែលទំនងដូចជាអាចបញ្ជាក់ថាបុរសដែលយើងកំពុងសេពគប់ជាមួយ មិនបានឱ្យតម្លៃយើងក្នុង នាមជានារីដែលគេស្រឡាញ់ អាស្រ័យលើបទពិសោធរបស់មិត្តអ្នកអាន។
ជាចុងក្រោយ បុរសណាមិនឱ្យតម្លៃយើង សូមអនុញ្ញាតឱ្យគេចាកចេញទៅរកមនុស្សណា ដែលស័ក្តិសមនឹងសមត្ថភាពនៃ តម្លៃដែលមានក្នុងខ្លួនរបស់គេចុះ។
Picture Credit: Pinterest
Facebook Page: https://www.facebook.com/dynawriter
YoutubeChannel: https://www.youtube.com/channel/UCgleeXOLLxznBOO-zCpQ1Xw
#T2MM
#DynaDiary_Love
#KeepFightingStayInspiring
#HealYourSouldHoldYourDream
Kim Hana 